საქართველოს პრემიერ-მინისტრმა ნიკა გილაურმა ინდოეთში ვიზიტის დროს ადგილობრივ ბიზნესმენებს ქვეყნის საინვესტიციო გარემო პირადად გააცნო.

საპარლამენტო უმრავლესობა 2011 წლის ბიუჯეტის პროექტი განიხილა. დეპუტატების კითხვებს მომავალი წლის ბიუჯეტთან დაკავშირებით, მთავრობის წარმომადგენლები პასუხობდნენ.

საკანონმდებლო ორგანომ მომავალი წლის მთავარი საფინანსო გეგმა წლის ბოლომდე უნდა დაამტკიცოს.

8 ოპოზიციური პოლიტიკური პარტია საარჩევნო გარემოს გაუმჯობესებასთან დაკავშირებით სპეციალურ განცხადებას აქვეყნებს. განცხადებაში ოპოზიციური პარტიები მზადყოფნას გამოთქვამენ ხელისუფლებასთან კონსულტაციების დასაწყებად საარჩევნო გარემოს გაუმჯობესებასთან დაკავშირებული საკითხების ირგვლივ.

ქართული მხარე მზადაა, მალაიზიაში დაკავებულ საქართველოს მოქალაქეებს ადვოკატი დაუქირაოს.

`თუ ჩვენ მოგვეცემა საშუალება, რომ დაკავებულ ქართველებს ქართველი ადვოკატი დავუნიშნოთ, ან საქართველოს მიერ დაქირავებული, ჩვენ ამისთვის მზად ვართ,`- განაცხადა საქართველოს საგარეო საქმეთა მინისტრის მოადგილე ნინო კალანდაძემ დღეს გამართულ ტრადიციულ ბრიფინგზე.

მოძრაობა სამართლიანი საქართველოსთვის ლიდერი პარტიის წევრების დევნას აპროტესტებს. ამ თემაზე დღეს პარტიის ლიდერმა ზურაბ ნოღაიდელმა და ერთ-ერთმა წევრმა მანუჩარ თირქიამ ისაუბრეს.

ზურაბ ნოღაიდელი აცხადებს, რომ მისი პარტიის წევრთა წინააღმდეგ პოლიტიკური შანტაჟი გრძელდება. ერთ-ერთ მაგალითად კი ზუგდიდის რაიონის ყოფილი დეპუტატობის კანდიდატის მანუჩარ თირქიას შემთხვევა მოიყვანა. მისი თქმით, თირქიას წინააღმდეგ სისხლის სამართლის რამდენიმე საქმეა აღძრული.

შეერთებული შტატების მთავრობის და USAID-ის დაკვეთით, ახალი კვლევები ჩატარდა. USAID-ის მიერ დაკვეთილი კვლევა ამერიკის რესპუბლიკურმა ინსტიტუტმა ჩაატარა, ტექნიკურად კი კვლევითმა ორგანიზაცია გელაპმა შეასრულა.

პოპულარული და ავტორიტეტული ჯგუფი კვლევითი ორგანიზაციების ტოპ-ხუთეულში შედის და აქტიურად მუშაობს მსგავსი ტიპის გამოკითხვებზე.

შეერთებული შტატების მთავრობის და IRI-ს კვლევა საქართველოს მასშტაბით 27 სექტემბრიდან 7 ოქტომბრამდე ჩატარდა და მასში 1500-მა ადამიანმა მიიღო მონაწილეობა.

კითხვაზე, რომელსაც კორუფციის დონე უნდა გამოევლინა, გამოკითხულთა 98-მა პროცენმტმა განაცხადა, რომ ბოლო 12 თვის განმავლობაში ქრთამი არ გადაუხდია.

რომელ სექტორში უნდა გატარდეს ყველაზე მეტი რეფორმა? გამოკითხულთა უმეტესობამ პირველ სამ ადგილზე ეკონომიკა, ჯანდაცვის სფერო და განათლების სისტემა დაასახელა.

მოძრაობა "სამართლიანი საქართველოსთვის" ლიდერმა ზურაბ ნოღაიდელმა სამომავლო პოლიტიკურ გეგმებსა და რუსეთში ვიზიტის შედეგებზე დღეს პრესკლუბ პრაიმ-ტაიმში ისაუბრა.

ოპოზიციური მოძრაობის ლიდერი აცხადებს, რომ რუსეთში მცხოვრები ქართველების შესახებ პირადად მიიღებს ინფორმაციას ფედერაციის ხელმძღვანელობისაგან. რუსეთში აღწერა ტარდება და უახლოეს პერიოდში ზუსტად გახდება ცნობილი, რამდენი ქართველი ამომრჩეველი იმყოფება ამჟამად მეზობელი ქვეყნის ტერიტორიაზე.

საქართველო-ამერიკის ურთიერთობებზე ამერიკელმა სენატორმა რიჩარდ ლუგარმა ისაუბრა. ცნობილი პოლიტიკოსის თქმით, ოკუპირებულ ტერიტორიებთან მიმართებით პროცესი დამაკმაყოფილებელი არ არის, თუმცა არსებობს პოზიტიური მხარეებიც.

ამ თემაზე კომენტარი ლუგარმა საგარეო ურთიერთობათა საბჭოში შეხვედრის დასრულების შემდეგ გააკეთა.