ბლოგერები
ინტერნეტით სკანდალურ ინფორმაციას ავრცელებენ: პატრიარქმა კირილმა ცოტა
ხნის წინ ფსკოვში ყოფნისას პრემიერ-მინისტრ პუტინის მეუღლე ლუდმილა პუტინა
სპასო-ელეაზაროვის მონასტრის იღუმენიად დანიშნა. ამის შესახებ პირველად
pritula.livejournal.com-ის ერთ-ერთმა მომხმარებელმა განაცხადა. საიტზე
სპეციალური მითითებაა იმასთან დაკავშირებით, რომ პატრიარქმა ლუდმილა პუტინა
იღუმენიად სწორედ დანიშნა და არა - აკურთხა.
როგორც ბლოგერმა
დაწერა, მას ეს ამბავი ტელეფონით დედამ შეატყობინა.
pritula.livejournal.com-ის ინფორმაციით, ლუდმილა პუტინას ფსკოვის
მონასტერში წასვლის შესახებ ხმები ერთი წლის წინაც ვრცელდებოდა.
გავრცელებული
ხმების განხილვა ინტერნეტში მას შემდეგ დაიწყო, რაც ეს თემა საკუთარ
ბლოგში ცნობილმა მსახიობმა სტანისლავ სადალსკიმ წამოჭრა. როგორც
ვებ-საიტი "Stringer"-ი იტყობინება, პუტინას მონასტერში წასვლის ამბავს
ახლა მთელი ფსკოვის ოლქი განიხილავს.
გაუგებარია, რით არის
განპირობებული პუტინას მხრიდან მონასტრის მიმართ ასეთი დიდი ინტერესი.
აგვისტოს დასაწყისში ცნობილი გახდა, რომ პრემიერ-მინისტრის პირადი
განკარგულების საფუძველზე ქვეყნის ბიუჯეტიდან მცირე ზომის მონასტრისთვის
უზარმაზარი თანხა - 48 მლნ რუბლი გამოიყო. ეს თანხა მონასტრის რესტავრაციას
უნდა მოხმარებოდა, აქედან 37 მლნ - მონასტრის სასტუმრო კელიის
რეკონსტრუქციას, სადაც, როგორც გაირკვა, საკმაოდ მაღალი რანგის სტუმრები
ჩერდებიან.
თავად ლუდმილა პუტინას ამ საკითხთან დაკავშირებით კომენტარი არ გაუკეთებია.
