უკრაინულ sport.segodnya.ua-სთან საუბრისას კალაძემ განაცხადა, რომ მის მიმართვას ჯერ არავითარი გამოხმაურება არ მოჰყოლია და როგორც ირკვევა, იგი საჩივრის შეტანას სტრასბურგშიც გეგმავს.

გიორგი დემეტრაძე, რომელიც დიდი ხნის განმავლობაში საქართველოსა და უკრაინაში წარმატებით თამაშობდა, მაფიასთან კავშირის, იატაქვეშა ტოტალიზატორის მოწყობისა და გამოძალვის ბრალდებით დააკავეს. თქვნ საქართველოს პრეზიდენტს მიხეილ სააკაშვილსა და პატრიარქს ილია II-ს მისი გათავისუფლების თხოვნით მიმართეთ. რეაქცია როგორი იყო?
- რეაქცია ჯერ არაა. გიორგის ადვოკატებს იმ დოკუმენტების გაცნობის საშუალებას არ აძლევენ, რომლებიც მათ უნდა წარუდგინონ. გაურკვეველი სიტუაციაა. კიდევ რამდენიმე დღე მოვიცდი და ახალ განცხადებას გავაკეთებ.

რის თაობაზე?
- ჯერ ამის შესახებ საუბარი არ მინდა. ვნახოთ. თუმცა, ვიდრე "დემეს” არ გაათავისუფლებენ, ჩვენ არ გავჩერდებით და ვიდავებთ, სტრასბურგშიც წავალთ. რომ ვიცოდე, რაღაც ისე არ გააკეთა, მაშინ, სიტყვას არ ვიტყოდი. კანონი ყველასთვის ერთია. როდესაც იცი, რომ ადამიანი არაფერ შუაშია, ყოველივე აბსურდს ემსგავსება. საქართველოში სიმართლის თქმა ბევრს ეშინია. თუმცა, ვიდრე ცოცხალი ვიქნები, სიმართლეს ვილაპარაკებ იმის თაობაზე, რაც ჩვენ ქვეყანაში ხდება. და ეს არა მხოლოდ საქართველოში, უკრაინასა და რუსეთში ეცოდინებათ. პასუხს ვაგებ, რომ ამას ყველგან გაიგებენ. ის რაც ხდება - განუკითხაობაა.

ჩვენთან ამბობენ, რომ ქვეყანა ვითარდება და დემოკრატიაა. აი, ესაა ჩვენი დემოკრატია. ის რაშიც "დემეს” ადანაშაულებენ, რომ "ქურდების უახლოესი პიროვნებაა”, სასაცილოა. მსგავსი ბრალდება წაუყენო ადამიანს, რომელიც მთელი ცხოვრება პროფესიონალურ დონეზე ფეხბურთს თამაშობდა... მას ამ ბინძური საქმეებისთვის უბრალოდ დრო არ დარჩებოდა. რასაც მას აბრალებენ, მსგავსი არაფერი მომხდარა. არსებობს სატელეფონო საუბარი, რომელშიც, როგორც ისინი ამბობენ, კრიმინალური ავტორიტეტი ვიღასაც ურეკავს და ეუბნება, რომ ვიღაცამ ვიღაცას ფული უნდა მისცეს. არც გვარს ასახელებს და არც არაფერს. ამ დროს კი, "დემეს” იჭერენ. ადვოკატებმა თქვეს, რომ ფული მისი საერთოდ არ ყოფილა და "დაუდეს”. მასთან ერთად ორი მეგობარი იმყოფებოდა – ერთს იარაღი "ჩაუგდეს”, მეორე კი, გაუშვეს.

ე.ი. თქვენი მონაცემებით მტკიცებულებები "ჩაუგდეს”?
- დიახ.

რა მიზნით?
- ჩვენთან მსგავსი რამ პირველად არ ხდება. ის ადამიანები, ვინც არ ეთანხმება სახელმწიფოს პოლიტიკას, ვინც წინააღმდეგია... თითოეული მათგანისგან ბენ ლადენის შექმნა შეუძლიათ. თუმცა, "დემეს” პოლიტიკასთან არავითარი შეხება არ აქვს.

ამ ხნის განმავლობაში გიორგისთან ურთიერთობა გქონდათ?
- არა, მაგრამ ვიცი, რომ ის საკუთარ უდანაშაულობაში დარწმუნებულია. მამამისთან მაქვს ურთიერთობა, რომელიც ბუნებრივია მომხდარს განიცდის.

თავის დროზე, გავრცელდა ინფორმაცია, რომ კარიერის დასრულების მერე, კალაძე საქართველოს პრეზიდენტობას აპირებს. რადგან იციან, რომ გიორგი თქვენი უახლოესი მეგობარია, შესაძლოა თქვენთვის დარტყმის მიყენება სურდათ?
- არა მგონია. რაც შეეხება პოლიტიკას, ჯერ ფეხბურთს ვთამაშობ. კარიერას რომ დავასრულებ, განცხადებას გავაკეთებ, შემდეგ რით დავკავდები. ჩემი ხალხის ყოფას ძალიან განვიცდი. მინდა, რომ ქვეყანა განვითარდეს და ხალხმა მშვიდობიანად იცხოვროს. ჩვენ ომი არავისთან გვსურს. უნდა ვესაუბროთ ჩვენს ძმებს ოსებსა და აფხაზებს. საქართველო პატარა და სტუმართმოყვარე ქვეყანაა. ჩვენ გვსურს კარგი ურთიერთობა გვქონდეს რუსეთთან, უკრაინასთან, ამერიკასთან – ერთი სიტყვით ყველასთან.

გადავიდეთ თქვენთვის უფრო სასიამოვნო თემაზე. ცოტა ხნის წინ, თქვენს შვილს, ლევანს წელიწადი შეუსრულდა. დაბადების დღე როგორ აღნიშნეთ?
- თბილისში ერთად ვიყავით. თუმცა, ჩვენთან ამბობენ, რომ ბავშვს, როდესაც წელიწადი უსრულდება, დაბადების დღის აღნიშვნა არ შეიძლება. ამიტომ, არ გვიზეიმია.

ბურთით ეთამაშებით?
- ვთამაშობთ ხოლმე. მინდა, რომ ის ფეხბურთელი გახდეს. თუმცა, მთავარია, კაცი გაიზარდოს და პატრიოტი.

პამპერსებს უცვლით?
- არა, მაგრამ გამოცვლა ვიცი.

მომავალ სეზონში სად ითამაშებთ, უკვე ცნობილია?
- "მილანში” ბევრი ცვლილებებია – ზოგიერთმა ფეხბურთელმა კარიერა დაასრულა, ზოგიერთი წავიდა, გუნდს ახალი მთავარი მწვრთნელი მასიმილიანო ალეგრი ჰყავს. რაც შეეხება ჩემს კარიერას, ძალიან ამაყი ვარ იმით, რასაც 10 წლის განმავლობაში "მილანში” მივაღწიე. კლუბთან კონტრაქტი კიდევ ერთი წელიწადი მაკავშირებს. მის გახანგრძლივებას მთავაზობენ. ვარჯიშს 20 ივლისს განვაახლებთ. ჩავალ და ხელმძღვანელობას დაველაპარაკები. ჩემთვის გასული სეზონი წარუმატებელი და უცნაური იყო. "მილანში” მხოლოდ 10 შეხვედრა ჩავატარე. არადა, წინა 9 სეზონის განმავლობაში 300 მატჩამდე ვითამაშე. დარწმუნებული ვარ, დავამტკიცებ, რომ "მილანის” დონეს შევესაბამები.

კლუბიდან წასვლის ვარიანტებს არ განიხილავთ?
- არა. ამის შესახებ ძალიან ბევრს წერდნენ, მაგრამ ყოველივე ჭორია. ამბობდნენ, რომ თითქოს ჩემთან მოლაპარაკებას კიევის "დინამო” აწარმოებდა, რაც არასწორია.

ეკონომიკური კრიზის მერე, თქვენი ბიზნესი როგორ მდგომარეობაშია? როგორც ცნობილია სასტუმროები და ბანკი გაქვთ...
- სასტუმროებიც და ბანკიც მუშაობს. ერთდერთი, რაც საქართველოში შევაჩერეთ, სამშენებლო ბიზნესია. თბილისში პატარა ქალაქის აშენება გვსურდა 80 ჰექტარზე, მაგრამ კრიზისა და ომის მერე, პრობლემები გაჩნდა. არავის სჯერა, რომ ჩვენთან ყველაფერი მშვიდად იქნება და ომი აღარ მოხდება. ჯერჯერობით, ინვესტორების დარწმუნება ძნელია – ყველას ეშინია იმის განმეორების, რაც შარშანწინ აგვისტოში მოხდა. რაც შეეხება ბანკს – მუშაობს. გარდა ამისა, მოლაპარაკებას იტალიურ ბანკებთან ვაწარმოებთ, რომლებსაც ქართულ ბაზარზე შემოსვლა უნდათ.

ბანკს შემოსავალი მოაქვს?
- მოაქვს, მაგრამ ძალიან დიდი არა. ჩვენ პატარა ბანკი გვაქვს, რომელსაც მხოლოდ ერთი ფილიალი გააჩნია. კრიზისის დროს პრობლემები ბევრ ბანკებს ჰქონდა, მაგრამ ჩვენ ამის მერე გავიხსენით.