უსაფრთხოების წინა ბალიშების დანიშნულებაა პირდაპირი შეჯახების დროს მძღოლის და მგზავრების დაცვა ტრავმებისაგან, რომლებიც შეიძლება გამოიწვიოს სალონის მყარ დეტალებთან ადამიანის შეჯახებამ ან საქარე მინის ნამსხვრევებმა. ავარიის დროს წინიდან დარტყმის შემთხვევაში მანქანის წინა ნაწილში განთავსებული სენსორი სიგნალს გადასცემს მართვის ბლოკს. ის თავის მხრივ იმპულსს გადასცემს დეტონატორს, რომელიც ფეთქდება და აფეთქების შედეგად წარმოქმნილი გაზით 0,04 წამში ბერავს უსაფრთხოების ბალიშებს.

უსაფრთხოების წინა ბალიშების გარდა თანამედროვე ავტომობილები აღჭურვილია გვერდითი ბალიშებითაც. ისინი განკუთვნილია მგზავრების დასაცავად გვერდიდან დარტყმის შემთხვევაში და მოთავსებულია ავტომანქანის კარებში ან წინა სავარძლების კედლებზე.

უსაფრთხოების ბალიშების გამოყენებისას პირდაპირი შეჯახების დროს მძღოლის დაღუპვის ალბათობა მცირდება 20-25%-ით.