მთავარი » 2010 » თებერვალი » 10 » ინდაურის საცივი
7:39 PM ინდაურის საცივი | |
მასალა:
ინდაური: 1 ცალი, ჯობს ახალგაზრდა, არა უმეტეს 1 წლის; თუ მეტი
ასაკისაა, ხარშვა დასჭირდება ძალიან დიდხანს და საბოლოოდ შეიძლება მაინც არ
ივარგოს; ჯობს მომზადდეს ნახევარ–ნახევარი დედალ–მამალი ინდაურის საცივი;
დედლის ხორცი ცხიმიანია და გემრიელი წვენი გამოდის, მაგრამ წვენში ჩასადები
ხორცი ცოტა რჩება (ცხიმი დნება და ნახარშში გადადის); მამალს ცხიმი
ნაკლები აქვს, ხორცი – მეტი; მაგრამ მამლის ნახარში ისეთი გემრიელი არ
არის.
ნიგოზი: 0,5 კგ
ნიორი: 5 დიდი კბილი
ხახვი (ქართული წითელი, მშრალი): 5 დიდი თავი
ქინძი ნედლი: ბაზრის 2 პატარა კონა (მეტიც შეიძლება)
ყვითელი ყვავილი დაფქვილი: 6 ჩაის კოვზი
ქინძის თესლი ხმელი დაფქვილი: 3 ჩაის კოვზი
უცხო სუნელი: 3 ჩაის კოვზი
მიხაკი დაფქვილი: დანის წვერზე
წითელი მწარე წიწაკა დაფქვილი: 2 ჩაის კოვზი დაახლოებით (გემოვნებაზეა
დამოკიდებული და წიწაკის სიმწარეზე. გასინჯეთ წინასწარ)
ძმარი ღვინის: გემოვნებით
მარილი: გემოვნებით
მომზადება:
1. ინდაურის მომზადება:
ინდაური კარგად გასუფთავდეს, გაირეცხოს;
მოეჭრას კისერი და კანჭები;
ყველაფერი ერთად ჩაიდოს ისეთ ქვაბში, რომელშიც ზუსტად ეტევა;
დაესხას წყალი ისე, რომ ინდაური დაიფაროს;
იხარშოს საშუალო ცეცხლზე დაახლოებით 2 საათი ;
პერიოდულად მოეხსნას ქაფი ქაფქირით;
პერიოდულად გაისინჯოს ხორცი ბარკალზე (არ ჩაიხარშოს!);
როცა მოიხარშება, გადმოვდგათ;
ამოიღეთ ხორცი ნახარშიდან;
წაესვას მარილი ხელით, ყველა მხრიდან (შიგნიდანაც);
დაიდოს ტაფაზე და შეიდოს გახურებულ ღუმელში;
ოდნავ შეიბრაწოს; ძალიან არ გამოშრეს!
გამოიღოს, გაგრილდეს;
დაიჭრას ზომიერ ნაჭრებად.
2. ნიგვზანი მასის მომზადება:
ნიგოზი გატარდეს ხორცის მანქანაში ორჯერ;
მოთავსდეს ემალირებულ ჯამში;
დაემატოს ყვითელი ყვავილი, უცხო სუნელი, ხმელი ქინძი, წიწაკა, მიხაკი
და 3 ჩაის კოვზი მარილი;
კარგად აირიოს;
ჯამი ოდნავ შეთბეს (ძალიან დაბალ ცეცხლზე!! მალევე გადმოდგით!)
მასა კარგად აიზილოს ხელით;
დაიყოს გუნდებად და ხელით გამოიწუროს ზეთი გუნდებიდან (ზეთი ცალკე
შეგროვდეს)
ქინძი და ნიორი გატარდეს ხორცის მანქანაში;
დაემატოს გამოწურულ ნიგვზიან მასას;
კარგად აირიოს სუფრის კოვზით.
3. ხახვის მომზადება:
ხახვი დაიჭრას ძალიან წვრილად;
იშუშოს ინდაურის ბულიონზე მოხდილ ცხიმში;
კარგად დარბილდეს, მაგრამ არ დაიბრაწოს, ოდნავ შევარდისფრდეს;
გადმოიღეთ ემალირებულ ქვაბში;
დაესხას 17 ჭიქა გაგრილებული ბულიონი (თუ ამდენი არ არის, შეივსოს
ანადუღარი წყლით);
4. საცივის წვენის მომზადება:
ნიგვზიან მასას დაესხას ცოტ–ცოტა ხახვიანი ბულიონი და აიზილოს კოვზით
სანამ ერთგვაროვანი თხელი ფაფის კონსისტენციის არ გახდება;
ჩაისხას ეს ფაფისებრი მასა დანარჩენ ბულიონში;
კარგად აირიოს;
დაიდგას საშუალო ცეცხლზე;
მუდმივი მორევით მივიდეს ადუღებამდე;
ჩალაგდეს დაჭრილი ხორცი;
ცეცხლს დაეწიოს, იდუღოს 10–15 წუთი;
გადმოიდგას, 3–5 წუთი შეგრილდეს;
დაემატოს ძმარი თითო სადილის კოვზი გემოვნებით თანდათანობით;
დაემატოს მარილი, თუ აკლია;
დაესხას გამოწურული ზეთი;
გაცივდეს.
©ზაირა ინასარიძე
| |
|
სულ კომენტარები: 0 | |